شقة 10 ... الحلقة الثامنة والأخيرة

الف مبروك عقبال الف رواية
هي رواية جميلة ومشوقة بس فيها حاجات مش منطقية
مثلا انت قلت انهم عملوا كل ده عشان يهربوا من المخابرات ويحصلوا على المال الكافي لاجراء العملية وانها هتتكلف حوالي 3مليون جنيه
وقلت انهم حصلوا على نص مليون جنيه ودفعوا منه للمحامي والباقي عملوا منه العملية طب ازاي
ده غير ان هو كان معاه 20 الف دولار سحبهم وهو رايح اليونان يعني حوالي 100الف مصري اتصرفوا تقريبا في السفر لانه طلع منهم جوازات السفر والباقي اداه لصاحبه اليوناني يعني ماكنش معاه فلوس تانية يكمل بيها
وبعدين هو عنده مطعم كان بدل ما يصرف ال20 الف دولار ويدي المطعم لعزيز وياجرله شقة ويسفره امريكا كان ممكن يجمع فلوس المطعم و20 الف دولار ويعمل بيهم العملية هو المبلغ كده مش مكمل 3مليون مصري بس تقريبا هتكون نفس المبلغ النهائي الي حصل عليه من المخابرات بعد القضية ده بعد خصم كل المصاريف دي
يعني بغض النظر عن العملية محتاجة كام هو كده المصاريف الي صرفها تقريبا هي المبلغ الي حصل عليه بعد القضية يعني ولا كانه عمل حاجة
بالنسبة للهروب من المخابرات الاسرائيلية كان ممكن يلجاوا فيها للمخابرات المصرية واجهزة الامن في مصر
وحاجة تانية ازاي هيبعتوا واحدة محكوم عليها بالاعدام ويقلولها انت رايحة تتقتلي وعايزينك تعملي كذا وكذا عشان الموضوع يبان كانه حسنية الي ماتت وهي توافق . الموضوع كان احسن لو انت وضحت انهم مثلا خدعوا الست دي وقالولها مثلا ان هي رايحة شقة امجد عشان تمثل عليه ان هي مراته عشان اي سبب وبكده يبقى هي فعلا اتفاجات لما شافت امجد مشنوق وبالتالي استغل امجد الفرصة وقتلها
وبعدين القصة بتقول انهم عملوا ده عشان يهربوا من المخابرات المصرية والاسرائيلية طيب هما هيربوا من المصرية ليه ومتقولش عشان حسنية كانت عميلة للموساد لان هي واضح انها انسحبت بعد فترة قصيرة ومكملتش مع الموساد عشان كده كانوا بيهددوها ده غير ان مش هي الهدف وان جوزها المقصود وهي ماساعدتهمش بحاجة
بس هي القصة في المجمل مشوقة جدا ومليانة مفاجئات يمكن هو ده الي وقعك في بعض الاحداث الغير منطقية من وجه نظري
كفاية كده ولو لقيت حاجة تانية هبقي اسأل عليها

لا بجد القصة تحفة ومشوقة اوي
وفعلا مليييييييئة بالمفاجاءات

بس أكبر مفاجاءة ان حسنية كانت عايشة
بس حلو اوي إعادة سرد القصة من وجهة نظر امجد وحسنية
وهما قاعدين يتكلموا عن العملية .....انا قلت أكيد العملية مش هتعدي على خير
بس أكيد المخابرات الاسرائيلية هي اللي قتلت حسنية
لسببين لان حسنية تركتهم وانضمت للمخابرات المصرية
والسبب التاني انتقاما من امجد لانه خدعهم
اسلووووووووووب رائع
وخياااااااااال ملهوش حل

ماشاء الله
القصة حلوة اوي و مشوقة جدا



و انا عندي ملاحظة كدة صغيرة

دخل عزيز العمارة ووصل
الى شقة أمجد فوجد الباب مفتوحا!!!! دخل عزيز الشقة وهو يخطو خطوات بطيئة
وينظر حوله وينادي ...أستاذ امجد...أستاذ امجد!!!...كان امجد حينها يقف
وراءه ولكن ليس بمفرده وانما يحمل في يده الة حديدية حادة انقض بها على
رأس عزيز حتى اغشي عليه!!!


...ثم بعد ذلك قام بنزع ملابس
عزيز حتى لا تصيبها الدماء وبعد ذلك قام امجد بخلع ملابسه هو وألبسها
لعزيز حتى يبدو ان المعتدي عليه هو أمجد وبعد ذلك قتله بسكين!!!ولكي لا
يتم التعرف على صاحب الجثة...قام أمجد باستخدام ساطور وقطع رأس
عزيز!!!!!!!!!!!!!....ووضعه

ا داخل الحقيبة التي يضع فيها عزيز الوجبات....وبعد ذلك ارتدى امجد ملابس عزيز..و قام بتسريب الغاز من المطبخ


واشعال
النار في احد ستائر احدى الغرف وخرج من العمارة امام أعين المخابرات
المصرية والاسرائيلية ..الذين ظنوا انه عزيز واخذ دراجته النارية
وانطلق..وما هي اللحظات حتى تعانقت النار مع الغاز وانفجرت الشقة

و احنا بنقرأ القصة تخيلنا فعلا المشهد و صدقنا ان امجد قتل عزيز

أمجد : مقابل ان ياتي اليّ يوم السفر الى اليونان ومعه في حقيبة الطعام جثة مقطعة...
يسلمني
اياها ويسلمني ملابسه التي يرتديها!!!!! ودراجته النارية!! ثم يصعد هو على
شقته التي قمت بتاجيرها له.. وانا ارتدي ملابسه وأفجر الشقة حتى تبدو
الجثة محروقة ولا يمكن تميزها...

و بعد كدة اكتشفنا ان عزيز ما اتقتلش و لا حاجة مع اننا شوفنا مشهد القتل فعلا
انا ما عرفش في كتابة القصص اوي
بس باشوف كدة في الافلام
ان مثلا المشهد الاول مش بيحكوه بالتفصيل زي ما حضرتك وصفت
و انما بيقطعوا الجزء اللي احنا المفروض نفهمه
و هو مشهد القتل و اللي هو ما حصلش في احداث القصة الحقيقية
و بالتالي بيبقى الحدث منطقي لينا في اخر القصة
لاننا ما شوفناش الحدث كله و انما فهمنا الهدف من الحدث
و اللي امجد عايز يوصله للمخابرات المصرية
انا مش عارفة كدة الموضوع وصل و لا لا

من الذي قتل حسنية بالظبط؟

انا حاسة ان المخابرات السرائيلية هي اللي قتلت حسنية
لان اولا المخابرات المصرية ما اظنش انها هتقتل كدة
و انما بتحاول تتصرف علشان ترجع اي مجرم لارض الوطن و تحاكمه
(انا مش عارفة اوي في اساليب المخابرات .....بس ده اعتقادي )
تاني حاجة
لان عم مرزوق اللي طلع من المخابرات الاسرائيلية
كان عارف امجد دفع كام لعم سيد
يبقى اكيد عم سيد تبعم

بس بجد مجهود رائع جدا
و في انتظارالاصدارات القادمة
و يا ريت حضرتك تقولنا مين اللي قتل حسنية

اولا وقبل اي حاجة اشكر ابو حميد على الشغل العالي اللي هو عامله
باختصار شديد.....د.بسملة
بالنسبة لموضوع الفلوس....هو جابها من المخابرات الاسرائيلية نتيجة التعامل معاهم وانه انضم لهم..بس انا وقعت في حتة انيي مقلتش انه اشتغل معاهم وبدا يقبض منهم لان الاحداث كانت سريعة فملحقتش اقول انه كان بياخد فلوس وكون ثورة من المخابرات الاسرائيلية نتيجة تقديم لهم اختراعات ...كنت المفروض اقول على الاقل اه اشتغل معاهم سنة وكون ثورة بس وقعت مني الحتة ده
بالنسبة لموضوع الست المحكوم عليها بالاعدام...انا موضحتش الصورة..وده برده غلط مني
بس انا كنت اقصد زي ما حضرتك قلتي انهم مقللهاش انها هتتقتل...بس موضوحتهاش..انا قلت ان المخابرات استخدمتها وكنت اقصد باللفظ ده انهم مقللهاش انه هتموت....
د.سيمو..........اذا كنت وقفتي في النص في حسابية الفلوس..انا بقى وقفت في النص في كلمة "نخنوخ"..على العموم انا يمكن وضحت النقط اللي حضرتك كنت بتستفسري عنهم
د.ساندي..هي فعلا ظهور حسنية تاني كانت مفاجأة بس المفاجأة الاكبر هي انه تكون متفقة مع أمجد ده ذات نفسي اتفاجئت
ابو حميد....تسلم يا غالي ..
اسلام....غسلوني!!!! دول عصروني يابا
منورني وواحشني جدا
د.حياة
وصلت وجهة نظرك وبصراحة انا فضلت اسيب النهاية مفتوحة للقارئ وهو يتخيل بقى وكل واحد وتفكيره
المخابرات المصرية والاسرائيلية عندهم المبرر بس انا فضلت اخلي النهاية مفتوحة
بصراحة يا جماعة انا سعيد جدا بالردود ده خاصة ان كل واحد بينبهني على حاجات صغيرة ممكن اكون مخدتش بالي منها
بس الحمد لله ...انها عجبتكم خاصة واني اول مرة اكتب رواية 8 حلقات....
بس انا بفكر المرة اللي جاية اخليها رواية رعب
ربنا يسهل

وانا بردو مش هسأل لأن اكتر حاجه كنت هعلق عليها هي الطريقه اللي المخابرات رجعت بها امجد
وسبق وانت رديت عليها
وطبعا دي كلها حاجات صغيره بالنسبه لروعه القصه لا تنقص من قيمتها ابدااااااااا
فعلا قصه ممتعه جــــــــــــــدا

وإلى اللقاء في رواية اخرى بوليسية في الصيف القادم

ان شاء الله تبقي اجمل واجمل

شكرا ....ليكي يا د.ايمي
وفعلا منكرش ان القصة فيها حاجات كتير مش مقنعة
بس في جزءية مش عارف ليه محدش علق عليها
وهي ان امجد سد انبوبة مياه الصرف الصحي ب30 كيلو اسمنت!!!!..ومعاها صخرة
وانبوبة مياه الصرف بتبقى قطرها حوالي متر فصعب ان 30 كيلو اسمنت يسدوها ولو استخدمنا صخرة كبيرة ممكن الموضوع يمشي شوية
بس في الاخر ده قصة من وحي الخيال مش حقيقية علشان كده كانت فيها قصور