الرئيسية
من طرف الأمل المشرق السبت 20 فبراير - 9:37:54السلام عليكم ورحمة الله وبركاتة
دا موضوع لاحدي الطبيبات تعرض فية الخبرات الي لازم علي
الاقل نتعلمها في فترة الامتياز ( وهو بصيغة المؤنث )
وهو منقوووووووووووووووووووول
الحمدلله والصلاة والسلام على رسول الله وعلى آله وصحبه أجمعين
بسم الله الرحمن الرحيم
بما انى اشتغلت فترة فى الصحه وفى وحده ريفيه وشفت ايه اللى كان مفروض أعمله ومعملتوش وايه اللى أفادنى وهكذا
أبدأ بالنساء والتوليد:
القسم ده مهم جداااا فوق ما تتصوروا
شغل الوحدات ماهو الا أطفال ونساء وتوليد 90% من حالاته
مطلوب منكن يا بنات فى الامتياز الحضور فى عيادات تنظيم الأسرة
لان ده شغل الوحدات
طيب اتعلم ايه هناك؟؟
1_ تركيب وازالة اللولب "هام جدا"
2- حقن منع الحمل وال intradermal implants
شوفى طريقة تركيبها وامتى بنستخدم كل وسيله وايه المطلوب قبل استخدام كل وسيله
يعنى مثلا...
مهم جدا ان الست ميكونش ضغطها عالى والا مينفعش تاخد الحقنه او الحبوب حتى
ومهم جدا ميكونش وزنها زايد
وفيه حملات كتير بتحاول توعى الناس ان اللولب أفضل من كل المشاكل دى ولكن فى الريف"لا حياة لمن تنادى"
3-السونار
فيه وحدات هيكون فيها سونار وحدات لا
مهم جدا تتعلمى ازاى تشوفى بالسونار وبدور على ايه وامتى احول حالة للمستشفى المركزى لان الطفل فيه علامات خطر او غيره
4-متابعة الحمل
الوزن والضغط وتحليل البول والانيميا ووضع الجنين وكل الحاجات دى
لا تستهينى بها اه موضوعات تافهه لكنها بتضيع حياة ناس
اتعلمى كويس ازاى تقرئى تحليل البول وامتى اشخص انيميا
وفى الارياف للاسف الست من دول تيجى لك مش عارفه هى حامل ف الشهر الكام أصلا وممكن يكون فيه مشكله كبيرة وهى متعرفش
مهم جدا تعرفى امتى بكتب للحامل حديد وبيتاخد ازاى
5-مهم جدا تتعلمى ايه العلامات الخطيره اللى مفروض تنبهى السيده الحامل ليها لو حصلت اى حاجه منها تجرى على المستشفى
مثلا حدوث نزيف او تقولك بينزل عليا ميه او مش حاسه حركة البيبى او صداع مستمر او ترجيع وهكذا...
6-اتعلمى ازاى تعملى pv examination وازاى تشخصى الالتهابات المهبليه وايه علاجها فى الانسات او السيدات
7-بالنسبه للولادات اعتقد انها مش بتتعمل فى معظم الوحدات لكن ممكن تدبسى فى حالة ولاده لو كنتى لوحده وفى مكان بعيد شويه وبالتالى مفروض تحضرى كام ولاده وتشوفى ممكن تتصرفى ازاى لو اضطريتى لده
مهم جدا كمان تعرفى الادويه اللى اسعارها حنينه عشان دى أهم جزئيه فى العلاج لانه لول الدوا غالى انسى ان حد هيشتريه
ونعرف الادويه اللى ممكن تتاخد اثناء الحمل والرضاعه
نتعلم ايه ف شفت الباطنه
بصوا بقى
الباطنه كبيرة وممله بجد
بس لو عرفتى هتاخدى منها ايه هتحسى انها لطيفه بعض الشئ يعنى
أولا قراءة ال ECG
ثانيا ازاى تظبطى ضغط لمريض
نبدأ بايه ونعلى ازاى وازاى أوطيه بسرعه لو كان عالى جدا ف الاستقبال وامتى أحول الحاله للمستشفى المركزى
ثالثا تظبيط السكر
مهم جداااااااا
ومهم كمان النصايح اللى هتوجهيها لمريض السكر عن كيفية الاعتناء بقدمه بالذات
ولو حصلت غيبوبة اهله يتصرفوا ازاى
وايه الادوية اللى تبدئى بيها وامتى تدى انسولين
رابعا ازاى تعالجى chest infection and bronchial asthma
خامسا ازاى تعالجى gastroenteritis
الحاجات دى تبدو سهله لكنها محتاجه تمرين لسبب بسيط انك مش هتكتبى ادويه كتير لان العيانين اغلبهم مش معاهم يجيبوا تمن التذكره اصلا
سادسا ازاى تشخصى hepatic encephalopathy وتتصرفى ازاى بسرعه
ف الغالب العيان بيكون عارف انه هيباتك ومش هييجى الوحده
لكن انا بتكلم عن بنات ممكن تتعين بعيد شويه ومفيش مستشفى قريبه
وكمان عشان الكبد منتشر بغباء ف مصر ربنا يعافينا واياكم
ازاى توجهى عيان الكبد عموما ياكل ايه ومياكلش ايه
والارشادات للى تديها لمريض فيروس بى أو سى
ازاى تفرقى فيروس A من ال gastroenteritis
ازاى تفرقى cardiac asthma من bronchial asthma
ايه الادويه اللى مكن تديها لمريض الكبد "طبعا مش هتدى أدويه نهائى الا بعد استشارة طبيبه مهما كان عنده" لكن معلومه ليكى يعنى اعرفى الادويه ال safe
أكمل لكن ان شاء الله عن الأطفال...
بصوا بقى الأطفال زى ما قلت فوق فى النسا مهمه فوق ما تتصوروا
شغل الوحدات الريفيه ومراكز تنظيم الأسره ماهو الا أطفال ونسا ومتابعة حوامل والكلام ده
مطلوب مننا نتعلم ايه فى شفت الأطفال عشان ينفعنا؟؟؟
-عايزين نتفق الأول ان الأطفال اللى هيجولنا هيكونوا من سن يوم لحد سن 18 سنه "مش عارفه ايه 18 ده اللى طفل ده بيبقى أطول منى بمراحل"
ما علينا
المهم يعنى انه كل الأعمار متاحه
بس اللى يهمنا لحد سن 13 أو 14 سنه مثلا لانه بعد كده ف الغالب بنعامله معاملة الكبار
طيب هتفرق ايه الصغيرين من الكبار يعنى؟؟
ال DOSES
لازم لازم تعرفى تدى اى طفل الجرعة المناسبة من أى دوا
طيب ودى هعرفها ازاى
أولا من حضورك هتعرفى كل دوا بندى منه كام لكل كيلو
طبعا هتوزنى الطفل وتضربى وتعرفى هنحل الدوا ده على كام سم ونديه على كام مره ف اليوم
ثانيا من كتاب النجار أو أى كتاب يشرح أدوية الأطفال بجرعاتها
انا واحده من الناس اللى عندى رأى ف الكتب دى
الكتاب ده بيحتاجه اللى ناوى يتعين اطفال أو اللى هتشتغل شغل وحدات ان شاء الله
تعامل الأطفال بأى صورة من الصور يعنى
-ازاى أشخص neonatal jaundice
واعرف اذا كانت physiological or pathological
and its level
-أكتر حالات الأطفال بتكون مغص واسهال وسخونية
أو
-كحه وسخونيه
أو
-كحه واسهال ومغص وترجيع
هنعرف طبعا كل حاجه بنكتب لها ايه
وأحسن حاجات لل upper respiratory
and lower respiratory
وكمان الاسهال ده معاه دم او مخاط ونعرف اصلا اذا كان اسهال او لا لانه ممكن الام تيجى تقول انه عمل مره واحده دى طبعا مش هنسميها اسهال لازم يكون 3 او 4 مرات على الاقل
اوعى تدى بريمبران للترجيع لانه بيعمل extrapyramidal manifestations فى الاطفال وهنكتب بدل منه cortigen B6
-ازاى نشخص حالات ال Dehydration وهل هى Plan A or B or C
وامتى أحولها وازاى الحق الطفل ده قبل ما ييجى له جفاف أصلا
-جداول تطعيمات الأطفال مش هتكون مطلوبه أوى الا للى هتستلم العمل كطبيب أول وهتكون مسئوله عن بعض حملات التوعيه والتطعيم ضد شلل الأطفال وما الى ذلك يعنى
-طبعا هفكركم ان ال Quenolones ممنوعه تمااااااما لأقل من 18 سنه فممنوع أى من مشتقاتها تتكب للأطفال
-حالات ال bronchial asthma كتيره جدا ف الاطفال لازم نعرف هنتصرف ازاى وامتى لو الطفل متحسنش يتحول للمستشفى
-لازم نفرق بين ان الطفل بيفوض بعد الرضاعه او انه بيرجع ونعلم الأمهات طريقة الرضاعه الصحيحه
-ازاى نشخص Rickets وامتى نعرف ان الطفل اتاخر ف المشى او التسنين وامتى يتكتب له كالسيوم
-حالات ال nocturnal enuresis هى صحيح مش كتير لكن لازم نفهم الأم ازاى تتعامل مع الطفل وازاى ان المشكله دى اغلبها نفسى وانها لازم تشجع البيبى وتساعده ومتسخرش منه قدام اخواته وامتى اقول الحاله دى محتاجه طبيب اطفال متخصص
-حالات ال parasitic infestation منتشره جدا ازاى نعالجها ومننساش الانيميا اللى ممكن تكون موجوده معاها وازاى نعالجها برده
الجراحة
بصوا بقى
الجراحه لذيذه وسهله وكلها أكشن كده
واللى حاببها هتكون متعه بالنسبه ليها
المهم فى الجراحه كشغل ممارس عام بعد كده حاجات بسيطه
أولا: الخياطة
الموضوع ده هيفيدك جدا لو اشتغلتى فى مستشفى بعيده شويه
لان معظم الوحدات مفيهاش أدوات خياطات والأمور دى بتكون فى المستشفيات فقط
لكن لا مانع انك تشتغلى فى مستشفى ان عاجلا وان أجلا
ال simple suture
inverted
matress
وألوان الخيوط
وكل واحد بيتفك امتى
وأخيط كل واحده امتى
كل دى حاجات مهمه طبعا
ثانيا:ازاى تغيرى على جرح
الموضوع يبدو ليكى بسيط ومش محتاج مهاره
لكن حقيقى لما بتدخلى تعملى بإيدك نظرتك للأمور بتتغير
وكل مره بتكتسبى مهارات جديده
وبتكونى أسرع وأكثر كفاءة
ثالثا:ازاى نغير على الجرح العالمى بتاع ال Diabetic foot بعد البتر أو كده
الموضوع ده غااااااااايه فى الأهميه
وعمله صح بيفرق كتير مع العيان
غير كده بقى اللى حابه تحضر عمليات وتعرف الخطوات كل دى حاجات تهم المتخصصين فقط وحضورها هيكون نوع من ال FUN فقط لا غير
لكن اللى تحب تحضر عمليات الأهم طبعا انك تحضرى
Appendicectomy
Hernias
Lipoma
Biopsy
Cancers Removal With Safety Margin
Exploration
واللى مهتم بحاجه يتابعها زى الثيرويد البريست كده يعنى
بعض الاسبشيالات
الرمد
كنت حابة أتكلم شويه عن الرمد
لكنه محتاج متخصص بيحب الماده وعايزها
وكمان محتاج أجهزة وبالتالى مش هيكون موجود الا فى مستشفى رمد
فيه بعض الحاجات البسيطه زى ازاى نشخص conjunctivitis
Allergy
corneal ulcer
foreign body
طبعا الحاجات دى محتاجه تتشاف على الأجهزه أقلها ال slit lamp
لكن ممكن جدا تشكى فيها وتوجهى العيان صح أو على الأقل متكتبيش دوا غلط يزود له الحساسيه أو يعمل له مشكله
الأهم على الاطلاق فى الاسبشيالات هى
الجلدية
بييجى فيها شغل كتير وهى أصلا كلها spot diagnosis
وناس كتير بتكسل تروح المستشفى أو العيادات الخارجيه عشان المواضيع دى
هو مطلوب مبدئيا نفرق الحاجات الظاهره دى حاجه جلديه فعلا ولا حاجه تابعه ل systemic disease
ولو كانت جايه مع disease systemic
نفرق هل علاجها لوحده ولا مجرد ما نعالج المرض ال systemic هتختفى
المرض الجلدى عموما زى ما كلنا عارفين بيتشخص من مكانه وشكل ال Lesion
وطبعا مش مطلوب منك كممارس عام إنك تعرفى كل الأمراض
لكن على الأقل الحاجات البسيطه ودى هتعرفيها من حضورك المستمر فى عيادات الجلدية أثناء سنة الامتياز ان شاء الله
المهم جدا جدا جدا انكم تاخدوا بالكم من نقطه فى غاية الاهميه
مريض الجلديه مهما كانت الحاجه اللى عنده بسيطه بيكون متخيل ان الناس كلها قرفانه منه ومش عايزه تقرب له
أرجوكم وأستحلفكم بالله عمرك ما تحسسى عيان بكده
اتعلمى كويس جدا تغطى انفعالاتك أمام كل المرضى خصوصا مريض الجلديه
لان نفسيته بيكون ربنا وحده الأعلم بيها
واللى حضرت فى عيادة الجلديه هتشوف الكلام ده وهتحس بقصدى بالظبط
احمى نفسك عند التعامل مع كل مريض
والبسى gloves لما تلمسى كل lesion
حقك انك تحمى نفسك فى كل مره
لكن حاولى تفهمى المريض ان ده لمصلحته هو وانك مش عايزه تلوثى المكان مثلا
بالله عليكن شوية رحمة فى التعامل مع المرضى فى النقطه دى بالذات
مفيش واحده فينا ترضى انها لو عندها حبايه حتى فى وشها تسيب أمة لا اله الا الله تتفرج عليها
فمابالك بمريض عنده حاجه كبيره
ياريت قبل ما نشوف أى حاجه نستاذن العيان
ونحترم رغبته لو رفض
ونعتذر له كمان
مش لانه مريض فى مستشفى حكومى او تعليمى اننا نذله
ولو كان مريض رجل اسحبى نفسك واخرجى
او استاذنيه
والله الحاجات دى بتأثر كتييييييير فى نفسيات المريض
ومحدش فينا يرضاها لنفسه
عايزه أقولكم حاولوا تحسوا المريض ده حد من أهلك
وشوفى هتتصرفى معاه ازاى
طبعا بعد الشر على أهالينا جميعا
لكن حطى نفسك مكانه وشوفى هتحافظى على شعوره ازاى
مهنتنا لا رقيب عليها الا الله
وده حمل كبير ومسئولية عظيمه
دربى نفسك عليها من دلوقتى قبل ما تشيلى مسئولية لوحدك فى مكان ما
كلنا بنغلط لكن الأهم اننا لا نتمادى فى هذا الخطأ
جعلنا الله واياكم ممن استخدمهم لخدمة دينه
وممن جعل لهم حظا فى تخفيف معاناة المرضى
لكن والله نفسية المريض أهم من الدواء وهى الأهم فى العلاج
جزي الله صاحبة الموضوع خير الجزاء
منقووووووووووووووووووووول
