قالولي بتحب مصر...قلت مش عارف...؟؟؟!!!

قصيدة رائعة للشاعر تميم البرغوثي...

https://www.youtube.com/watch?v=XcVtos7hnrg

انا مش عارفة يادكتور قصدك ايه بقصيدة رائعة
بس لو قصدك من الناحية الادبية يمكن بس انا مااعرفش لان الشعر مش من اهتماماتي ولا بفهم فيه عشان احكم بس الي اقدر احكم فيه ان دي قصيدة كتبها واحد اتعرض لظلم كبير من مصر خلاه ينسى افضال البلد دى عليه وللاسف الظلم ده اتحول لغضب وكره باين جدا في القصيدة

طبعا هو شاعر كويس وده مش فيه كلام وكتب قصيده حلوة
لكن أنا برضه عايزة أعرف حضرتك بتقول حلوة من ناحية ايه بالضبط؟
ومش فاهمه هو حضرته بيعيب على مصر بالقسوة دي ليه؟؟
كل بلد فيها الكويس والوحش والحياة السياسيه والأنظمه العربيه كلها سيئه وتكاد تكون أسوأ حالا من مصر كمان
يمكن علشان مصر هي اللي عاش فيها بس الأكيد انه زاي ماشاف منها الكويس لازم يشوف الي مش كويس هو مش هيكون أحسن من أهلها وأعتقد معاناته ليها أسباب وأي مصري ف أي بلد مس أمن البلد اللي عايش فيها كان هيتعرض لنفس اللي اتعرضله حضرته بالضبط ....
حضنك يامصر كبير
حاضن غني وحاضن فقير
حاضن ولادك واللي دق بابك
اللي صانك واللي خانك
ضم الغريب بحنية
وماقولتيلوش سامحني
ولادي أول بيا
لمتينا كلنا على أرضك دية
لكن للأسف محبتك
مالهاش عند الغريب دية
لما اتسأل عن حبك
قال ماجاش ف بالي مش عارف
وان شاف فيكي قسوة
ما الكل منها شايف
لكنك يامصر وطن
أرض وسما ونيل
بسمه وقت الحزن ع الشفايف
وايه لما تقسي يابلدي
برضه انتي ليا أهل ووطن

أعصابك يا حمزاوي يا حبيبي عاوزينك يا عم
وبعدين اللي بيته من ازاز ما يقفش عريان ف الصالة مش الكلام الفاضي اللي انت بتقوله ده
وفعلا القصيدة رائعة وعجبتني جدا وخاصة الجزء بتاع الحاكم بأمر الله
بس الموضوع ان الراجل اتمرمط هو وأهله حبتين تلاتة ف مصر
وده ما يديلوش الحق انه يكون قاسي على مصر
بس انا حبيت ادي لكل واحد حقه
وطبعا أولا وأخيرا شكرا يا أحمد ع الموضوع

صراحة انا لما حطيت الموضوع ما كنتش متوقع انه هيكون
ليه كل الصدى ده لأن زي مانتوا شايفين الموضوع سطرين و تميم اتكفل في بداية القصيدة
بشرح السبب وشرح كل حاجة...

احب ابين ان تميم ده من أشد المحبين لمصر...وهوا بيكلمها من وجهة نظر المحب لحبيبته
أو الابن لأمه اللي بتعامله وحش...القصيدة فيها نقد وفيها مدح كتير
بس باين طبعا ان معظم اللي قروا خدتهم الحمية للمصريين وازاي واحد فلسطيني يتكلم عن بلدنا
كده وغلطوا نفس الغلطة اللي اهل ام الشاعر غلطوها لما حب ابوه الفلسطيني يتجوز أمه...

يا عبيد اللي ملوكها عبيد...من إمته كانت رام الله من بلاد بره

طبعا كلكم نسيتوا او تناسيتوا ان كل الكلام اللي قاله الراجل ده...كلام صح وواقعي..
وقصص حقيقية..

قبل ما أبدأ الرد على كل عضو...أظن أن معظم اللي قروا سواء ردوا او ما ردوش
ما كملوش القصيدة للآخر...ويمكن يكون ردهم ده على اول دقيقة من القصيدة يمكن حسوا ان الشاعر بيشتم فيها
وما كملوش للآخر يشوفوا الراجل قصده ايه...

=============

إسلام أحمد
طبعا مبالغة كبيرة من الراجل اللي انته مقتبس رده يا إسلام...
بس هوا باين ان كلكم ماشيين على مبدأ "ادعي على ولدي واكره اللي يقول آمين" بمعنى احنا المصريين بس
اللي من حقنا ننقد واي حد تاني لأ...

شكرا يا صاحبي...

============

SH EL MASRY

دكتورة...القصيدة فعلا رائعة من حيث البناء الأدبي...والبلاغي حتى
رغم أنه قايلها بالعامية..

إلا لو كان حضرتك ضد المحتوى...فأنا بينت الحتة دي فوق....بالعكس الراجل ما نسيش افضال البلد ولا حاجة
بالعكس بيحبها جدا...وشفتله قبل كده حوارات كتير مش بيدافع عن نفسه وبس...كمان بيقول
انا زيي زي المصريين عشت طفولتي هنا وليا ذكريات...
واللي كتبه ده بيكتبه اي شاعر مصري ما بنقولش عليه حاجة...

شكرا لمرورك يا فندم...

================

dr.victim

شكرا على الرد يا فندم وبجد شرفتينا بإضافتك...
ممكن تشوفي الردود اللي فوق تقريبا مستوعبة كل النقاط اللي حضرتك شرحتيها..

=================

حمزاوي...

متهيئلي يا صاحبي ان الراجل ما شتمتش مصر قوي كده...
انا اول مرة سمعت القصيدة صراحة ضحكت على مقاطع كتيرة جدا
وحزنت على مقاطع اكتر...
والراجل بيشرح حاله وقصته بطريقة حلوة ومميزة...واظن ان كل الكلام اللي قاله حقيقي وصحيح 100%
بس لأنه طالع من واحد مش مصري...انتوا رفضتوه...

شكرا يا صاحبي على الكومنت...

===================

dr.ahmed88

شكرا يا ابو حميد لانك جيت...انته شايفهم كلهم قالبين على عليا وعلى تميم الغلبان..
المهم...

من الحتت الحلوة قوي في القصيدة جزئية الحاكم بأمر الله واللي هيا فيها ضمنيا نقد لكل الحكام
على مدار التاريخ...

فيه بيت شعر مش هاقدر انساه ومعلم في ذاكرتي من ساعت ما سمعتها اول مرة...

يا مصر ابنك في بطنك...بس خانقاه خنق..

شكرا مرة تانية يا احمد على الرد الجميل

سلامه عليكم في الاول
انا بس حبيت اقولك ان انا شايف حاجات غلط كتير في مصر
بس كان احساسي اول ماسمعت القصيده
اتنرفزت جدا..اتضايقت من الشاعر الكبير
سميها بقي زي ماتسميها
ادعي علي ابني واكره اللي يقول امين
مبحبش النقد اي حاجه
المهم انه سخر من تراث وامجاد لنا الحق ان نفخر بيها علي مر العصور
ودماغنا ماكلتناش ولاحاجه
هو كان ممكن ينتقد الفترة الحاليه ومكنش حد هايضايق
لان فعلا في سلبيات كتير دلوقتي
لكن ينتقص من عرابي وسعد
انا لسه مصري

واخيرا
هو مفيش حلاقين في فلسطين ولا ايه
؟؟؟؟؟؟؟؟؟؟

اللول حبيب الكل...

لكن ينتقص من عرابي وسعد
انا لسه مصري

هوا مانقدش دول او نقص منهم...هوا قال انه من كتر اللي شافه من ظلم في مصر
اول ما بييجي في باله لما بيسمع سيرتها الالم والظلم اللي اتعرضله هوا واهله...وبيتناسى الحاجات العظيمة التانية
اللي منها الهرم والنيل وعرابي وسعد...
الراجل قصده مدح في الحاجات دي مش ذم...وانه بيتناساها بس من كتر اللي شافه..

صراحة يا عبد الله انا ما حسيتش بالنرفزة اللي انته بتتكلم عنها دي اول ما سمعتها..
يا إما بقه أنا وطنيتي أقل منكم...
أو أنتوا عصبيتكم لجنسيتكم اكتر من عصبيتكم للدين والعروبة...

شكرا حبيبي عالكومنت..

==============

إسلام...الجزء الأأخير ده بيوصف فيه التراث...مش قصده يتهكم خالص يا صاحبي...

بداية أشكرك يا ناصر على التوبيك ده....
بيتهيقلي ان اللي قاله الشاعر..لا يعبر الا عن وجهة نظر فردية تخصه هو فقط نتيجة الظلم اللي اتعرضله من مصر...
واي انسان فينا لما بيتعرض لظلم من شخص مبيتفكرلوش الحلو..بيفضل ينتقده حتى لو صاحبه او حبيبه
كمان انا شايف انه مهجمش على مصر كل الهجوم اللي الدكاترة لمحوا ليه....بالعكس ..هو مدح بس بطريقة غير مباشرة
وزي ما قال احمد ناصر ان نتيجة الظلم بيخليه ينسى امجاد مصر...وده في حد ذاته اعتراف منه بامجاد مصر
واتفق مع اسلام ان اخر القصيدة كان فيها هجوم عنيف شوية....بس اي واحد لما بيبقى محروق من حاجة ويجي يكتب ممكن الكلمات تخونه في بعض الأحيان
اخيرا...ده وجهة نظر الشاعر والتي لا تعبر الا عن نفسه....
وشكرا يا ابو ناصر ع الدعوة....ويا ريت التوبيك اللي جاي يبقى عن...
مشربتش من نيلها....

شكرا يا مصطفى يا ناصر المظلومين والغلابة...

وشكرا لانك قبلت دعوتي لانك تقرا التوبيك...ياريت يبقى ردك ده من قلبك بجد ومقتنع بيه فعلا مش مجرد رد دبلوماسي
عشان تدافع عن صاحبك....

طبعا انته بينت وجهة نظر الشاعر يمكن باسلوب احسن مني...ووافقتني على كلامي...بس انا فعلا لغايت دلوقتي
مش مقتنع بان هجومه في الآخر كان عنيف للحد ده...

في الآخر أقولك...

لو شربت من نيلها لازم هتحنلها...ولازم تحبها...ولو انت بتحبها بجد...مش هترضى انها تظلمك...
عشان كده احنا بنعاتبها...

منور يا صديقي...

victim

عبيد أولاد عبيد

ما هيا دي حقيقة...هوا قصده ان احنا عبيد لربنا وملوكنا عبيد لربنا مش الفكرة اللي جات في بال حضرتك خالص...
يعني احنا زينا زي الفلسطينين عبيد برضه لربنا...هوا قصده المساواة بين كل البشر في العبودية..

عموما انا لسه مختلف مع حضرتك وشايف ان كلام الراجل عادي جدا وانه ما غلطتش
واللي قاله كله حقايق...

شكرا يا فندم على الرد...

ما هيا دي حقيقة...هوا قصده ان احنا عبيد لربنا وملوكنا عبيد لربنا مش الفكرة اللي جات في بال حضرتك خالص...
يعني احنا زينا زي الفلسطينين عبيد برضه لربنا...هوا قصده المساواة بين كل البشر في العبودية..

خامسا لما بيقول على لسان والدته قالتلهم يا عبيد ياللى ملوكها عبيد طبعا بيقصد هنا المماليك لان المماليك كانو مملوكين بس حكمو مصر مسكين هو مش عارف ان المماليك هما اللى طهروا فلسطين او الشام من الصليبين بعد صلاح الدين طبعا غير التتار الاخطر قوى اللى وقعت الخلافة العباسية

عبيد لربنا ايه بس يادكتور انت مش واخد بالك من كلام القصيده ولا ايه؟؟؟
ماهي باينه من غير تحيز ولا عصبيه والله ومش الكلمه بس الكلمه وطريقة القائها مايوحيش باللي حضرتك بتقوله ده خالص... أنا متأسفه اني بطول ف ردودي بس الواقع اني مش مقتنعه بدفاعك عنه كده
وأشكرك ع الموضوع ولو انها جت متأخر

حمزاوي...

اقتباس جميل ووجهة نظر احترمها...بس برضه ده ما ينفيش المعنى بتاعي..

============

victim

أها...الاختلاف لا يفسد للود قضية يا دكتورة...بس انا بدافع عنه لاني شايف
فعلا ان القصيدة حلوة وناس كتير صحابي حبوها...
ونقاد وصحفيين واعلاميين سمعوها وردة فعلهم ما كانتش زي هنا كده...

شكرا يا فندم...نورتينا...

============

عمور...

لكن أنا بصراحة معترض على فكرة تنزيل توبيك زي دا
وكمان ندافع عن رأيه كأننا بنسانده
و أنا مش شايف منه فايدة دا بالعكس عمل اختلاف حولين موضوع لازم نبقى متفقين عليه تماماً

انا لما نزلت الموضوع ده والله ما كان في بالي خالص كل الضجة اللي هتحصل دي
لأن من وجهة نظري انا شايف القصيدة جميلة والراجل ده استضافوه في كذا قناة مصرية
واتعمل معاه حوارات كتير وكان بيقول القصيدة وناس كتير شكرت فيها...يعني الموضوع
هنا انتوا مبالغين فيه شوية..
عموما بعتذر لو عملت بلبلة او لبش ملوش لازمة...

..... مصر .....

أرضٌ مـشــت عليـــها أشـــرفُ الأقــدام

يـوسـفُ ومـوسى أنـبياءُ الله ِخيـرُ الأنــام

زكاها محمدٌ عليه أفضلُ الصلاةِ والسلام

بجـنـدٍ لا يـُـوصـفُ إلا بالشـجاع ِالمـقـدام


فكيف لا أحبك يا مصر !!!!!!

شكرا يا حبي على الكلام الجميل ده وردك وبجد نورتني بوجودك...

=============

حسني...

هههههههههه
والله انته زي العسل وفي دنيا تانية...عيش يا سيدي...

خليك في حالك انا كنت داخل لعمرو مش ليك

طيب اطلع بره التوبيك بتاعي ياض...